Ministria e Ekonomisë ka nënshkruar një marrëveshje financimi me Kompaninë Rajonale të Ujësjellësit KRU “Bifurkacioni” në vlerë prej 1 milion euro për projekte kapitale në rajonin e Ferizajt dhe Shtërpcës. Investimi përfshin ndërtimin e një impianti trajtimi uji me kapacitet 35 litra në sekondë dhe rehabilitimin e rrjetit të ujësjellësit në Shtërpcë, me një vlerë prej 520 mijë euro. Projekti i dytë përfshin ndërrimin e gypit ekzistues nga fabrika e përpunimit të ujit në Pleshinë deri në qytetin e Ferizajt, me një vlerë prej 480 mijë euro. Qëllimi i këtyre investimeve është rritja e sigurisë dhe cilësisë së furnizimit me ujë të pijshëm, reduktimi i humbjeve në rrjet dhe përmirësimi i qëndrueshmërisë së sistemit të ujësjellësit, ndërsa zbatimi do të monitorohet nga Ministria e Ekonomisë dhe do të realizohet në përputhje me standardet e transparencës dhe llogaridhënies.