Bashkimi Evropian ka miratuar një paketë financiare prej 206.4 milionë eurosh për Kosovën në kuadër të programeve IPA 2026–2027 dhe Kornizës Investuese për Ballkanin Perëndimor. Fondet do të investohen në sektorë strategjikë si mjedisi dhe veprimi klimatik, energjia, menaxhimi i kufijve, konkurrueshmëria, qeverisja e mirë dhe sundimi i ligjit. Rreth gjysma e këtyre mjeteve do të përdoren për investime infrastrukturore, duke përfshirë ndërtimin e impiantit për trajtimin e ujërave të zeza në Podujevë, zhvillimin e hidrosistemit Ibër-Lepenc dhe segmentin e autostradës Qafë e Duhlës–Banullë. Sipas autoriteteve kosovare, këto investime do të forcojnë kapacitetet institucionale, do të përshpejtojnë përafrimin me standardet evropiane dhe do të sjellin përfitime të drejtpërdrejta për qytetarët dhe zhvillimin ekonomik të vendit.