Një grup prej 25 minatorësh të rinj kanë nisur punën në Minierën e Stantërgut, duke u bërë pjesë e gjeneratës së tretë në këtë sektor. Drejtori i Minierës Trepça, Shyqyri Sadiku, njoftoi se ata do t’i nënshtrohen një trajnimi gjashtëmujor teorik dhe praktik, i cili përfshin 120 orë teori dhe 180 orë praktikë në minierë. Ky proces është i domosdoshëm për të zëvendësuar minatorët që dalin në pension, pasi vetëm këtë vit pritet të pensionohen rreth 31 punëtorë. Aktualisht, Miniera e Stantërgut ka 675 punëtorë dhe rreth 30 inxhinierë të shpërndarë në departamente të ndryshme, ndërsa investimi në trajnimin e brezit të ri konsiderohet kyç për vazhdimësinë dhe zhvillimin e minierës.