Në Mitrovicë u organizua ceremonia e shpërndarjes së pajisjeve bujqësore për 28 gra fermere, në kuadër të një projekti të realizuar nga FAO në partneritet me UN Women dhe me financim nga Agjencioni Austriak për Zhvillim (ADA). Në aktivitet mori pjesë kryetari i Mitrovicës, Faton Peci, i cili theksoi rëndësinë e mbështetjes së grave në bujqësi dhe ndikimin e tyre në zhvillimin ekonomik dhe shoqëror. Ai vuri në dukje se përfshirja e grave në këtë sektor fuqizon rolin e tyre në shoqëri dhe ndikon drejtpërdrejt në ekonomi. Kryetari Peci paralajmëroi gjithashtu një rritje të konsiderueshme të mbështetjes për bujqësinë gjatë vitit të ardhshëm, duke premtuar dyfishim të buxhetit dhe fokus në sektorët e prodhimit në përkrahje të fermerëve.