Agjencia Franceze për Zhvillim, përmes Proparco, ka nënshkruar një marrëveshje financimi me Agjencionin për Financim në Kosovë (AFK) për një shumë prej 5 milionë eurosh, me qëllim fuqizimin e grave ndërmarrëse dhe zhvillimin e zonave rurale. Nga kjo shumë, 3 milionë euro janë dedikuar për gratë sipërmarrëse, ndërsa 2 milionë euro për mbështetjen e komuniteteve rurale. Ambasadori i Francës në Kosovë, Olivier Guerot, theksoi rëndësinë e përfshirjes së grave në biznes dhe jetën publike për forcimin e vendit, ndërsa drejtori i AFK-së, Xhevdet Spahija, njoftoi se ky bashkëpunim do të përqendrohet në kreditimin e grave në biznes dhe bujqësi. Drejtori rajonal i Proparco-s, Steve Gardon, shtoi se partneriteti synon të rrisë zhvillimin ekonomik gjithëpërfshirës në Kosovë duke mbështetur sidomos gratë sipërmarrëse dhe bizneset në zonat rurale, ku mungesa e financimit është më e theksuar.