Lidhja e Bizneseve të Kosovës thekson rëndësinë strategjike të sigurimit të qasjes në gazin e lëngshëm natyror amerikan dhe zhvillimit të infrastrukturës për të, si një faktor kyç për zhvillimin ekonomik dhe sigurinë energjetike të vendit. Aktualisht, Kosova mbështetet kryesisht në termocentrale të vjetra me linjit dhe import energjie, duke u përballur me kosto të larta dhe pasiguri në furnizim, që po dëmtojnë seriozisht bizneset vendore. Në një kohë kur vendet e rajonit po investojnë në rrjete të reja gazi, Kosova rrezikon të mbetet jashtë këtyre zhvillimeve, duke humbur konkurrueshmëri dhe duke rrezikuar zhvendosjen e fabrikave jashtë vendit. Lidhja e Bizneseve i bën thirrje Qeverisë të ndërmarrë hapa konkretë për integrimin në rrjetin rajonal të gazit natyror, duke theksuar se vendimet për energjinë janë vendime për të ardhmen ekonomike, ruajtjen e vendeve të punës dhe përmirësimin e klimës së biznesit në Kosovë.