Aleanca Kosovare e Bizneseve (AKB) ka shprehur shqetësim të thellë për normat e larta të interesit që aplikojnë institucionet mikrofinanciare në Kosovë, ku kreditë për familjet arrijnë deri në 22%, ndërsa për bujqit mbi 16%. Sipas kryetarit të AKB-së, Agim Shahini, këto norma nuk përbëjnë mbështetje financiare, por janë një barrë që shtyp dhe varfëron familjet dhe fermerët, duke i ekspozuar ata ndaj borxhit të pafund dhe falimentimit. AKB i konsideron këto norma si fajde të legalizuar që godasin shtresat më të ndjeshme të shoqërisë dhe kërkon hetim institucional, vendosjen e një tavanit ligjor për normat e interesit, ndërhyrje shtetërore për mbrojtjen e qytetarëve dhe transparencë të plotë mbi fitimet dhe praktikat financiare të institucioneve mikrofinanciare. Nëse kjo situatë vazhdon, AKB paralajmëron se sistemi financiar mund të kthehet në një mekanizëm që thellon varfërinë dhe pabarazinë sociale në Kosovë, duke theksuar nevojën për financim të drejtë që zhvillon familjet, bujqit dhe ekonominë e vendit.