Aleanca Kosovare e Bizneseve (AKB) ka shprehur shqetësim për mënyrën se si Fondi i Kursimeve Pensionale (TRUST), me vlerë mbi 3.2 – 3.4 miliardë euro, nuk po kontribuon në zhvillimin ekonomik të Kosovës. Pavarësisht fitimeve vjetore deri në 200 milionë euro dhe kontributeve të reja, ekonomia vendore mbetet e dobët, me mungesë kapitali për bizneset dhe papunësi të lartë. AKB-ja thekson se mungesa e vizionit dhe vendimmarrjes strategjike po pengon investimin e këtij kapitali në projekte të sigurta dhe zhvillimore brenda vendit. Për këtë arsye, ajo kërkon krijimin urgjent të mekanizmave ligjorë dhe financiarë për investime të sigurta në sektorë strategjikë si energjia, prodhimi dhe infrastruktura, për të shmangur varësinë e Kosovës nga importi dhe për të përmirësuar gjendjen ekonomike.