Aleanca Kosovare e Bizneseve (AKB) është organizata e vetme e punëdhënësve nga Kosova që po merr pjesë në aktivitetin ndërkombëtar “Peer Learning Activity” në Bruksel, të organizuar nga Bashkimi Evropian, Organizata Ndërkombëtare e Punës dhe European Training Foundation. Në këtë forum marrin pjesë përfaqësues nga qeveritë, sindikatat dhe organizatat e punëdhënësve të vendeve të Ballkanit Perëndimor, Ukrainës, Moldavisë dhe Marokut. Kryetari i AKB-së, Agim Shahini, thekson se kjo pjesëmarrje është një vlerësim i rëndësishëm për rolin e organizatës në dialogun social dhe zhvillimin ekonomik të Kosovës. Përvojat dhe praktikat më të mira evropiane që po prezantohen në Bruksel do të përcillen në Kosovë për të krijuar më shumë mundësi punësimi për të rinjtë dhe për të forcuar partneritetin ndërmjet institucioneve dhe sektorit privat.