Ministria e Mbrojtjes ka anuluar tenderin për ofrimin e shërbimeve mjekësore për kadetët e Forcës së Sigurisë së Kosovës, i cili ishte planifikuar të zgjaste 36 muaj me një vlerë prej 27 mijë eurosh. Shërbimet do të realizoheshin në kazermën “Adem Jashari” në Prishtinë dhe synonin të rrisnin operacionalitetin dhe efikasitetin e detyrave të FSK-së. Tenderi kërkonte që operatori ekonomik të kishte kapacitet për vizita sistematike për së paku 20 pjesëtarë në ditë dhe që objektet të ishin brenda 20 kilometrave nga kazermat, si dhe të dëshmonte kapacitet financiar. Megjithatë, procedura u anulua pasi në garë ishte pranuar vetëm një ofertë, e cila u konsiderua e papërgjegjshme sipas Ligjit për Prokurimin Publik.