Administrata Tatimore e Kosovës (ATK) ka rikujtuar se të ardhurat e realizuara nga kriptovalutat janë të tatueshme dhe duhet të deklarohen nga të gjithë personat fizikë dhe juridikë sipas legjislacionit tatimor në fuqi. ATK do të fokusohet në identifikimin dhe trajtimin e personave që nuk i deklarojnë këto të ardhura dhe nuk paguajnë tatimet përkatëse. Personat fizikë jo afaristë dhe afaristë duhet të zbatojnë Ligjin për Tatimin në të Ardhurat Personale, ndërsa personat juridikë Ligjin për Tatimin në të Ardhurat e Korporatave. Në rast të humbjeve nga aktiviteti me kriptovaluta, duhet mbajtur evidencë e veçantë dhe ATK do të ndërmarrë masa ligjore ndaj atyre që nuk përmbushin detyrimet tatimore.