Bashkimi Evropian po vendos një rregull të ri sigurie që do të detyrojë prodhuesit e makinave të përgatisin automjetet e reja për instalimin e sistemit “Alcolock”, një alkotest i integruar që parandalon ndezjen e makinës nëse shoferi ka alkool në gjak mbi kufirin e lejuar. Ky sistem nuk do të jetë i instaluar menjëherë në çdo makinë, por do të përdoret kryesisht për shoferët me shkelje të përsëritura në trafik, sipas vendimeve të gjykatave ose institucioneve përkatëse. Rregullorja e re, pjesë e paketës më të gjerë të sigurisë GSR2, përfshin edhe teknologji të tjera të avancuara për mbrojtjen e këmbësorëve, çiklistëve dhe monitorimin e sjelljes së shoferit. Ekspertët parashikojnë se përdorimi i këtij sistemi mund të ulë aksidentet fatale të shkaktuara nga alkooli deri në 65 për qind, duke përmirësuar ndjeshëm sigurinë rrugore në Evropë.