Agjencia e Ushqimit dhe Veterinarisë (AUV) ka ndaluar importin e 1,080 litrave vaj ulliri për sallatë nga kompania “Euro Made 2021” nga Lushnja, Shqipëri, pas një kontrolli në pikën kufitare të Vërmicës. Gjatë kontrollit, inspektorati ka konstatuar mungesë të të dhënave të nevojshme në deklaracionin e mallit dhe transportim në kushte jo higjienike, duke përfshirë edhe bashkëtransportimin me mallra jo ushqimore si detergjentë, që rrisin rrezikun e kontaminimit. Bazuar në Ligjin e Ushqimit dhe Ligjin për Mbrojtjen e Konsumatorit, produkti është vlerësuar si i papërshtatshëm dhe i rrezikshëm për konsum, prandaj nuk është lejuar hyrja e tij në Kosovë. AUV thekson se do të vazhdojë monitorimin e rreptë të produkteve ushqimore në të gjitha pikat kufitare për të garantuar sigurinë ushqimore dhe mbrojtjen e shëndetit publik.