Agjencia e Ushqimit dhe Veterinarisë (AUV) ka hapur një tender për kontraktimin e shërbimeve të asgjësimit të kafshëve të prekura nga sëmundjet ngjitëse në të gjithë territorin e Kosovës. Vlera e kontratës pritet të arrijë në 75 mijë euro dhe do të jetë në formën e një marrëveshjeje kornizë për 12 muaj, duke u zbatuar sipas nevojës dhe rasteve të paraqitura. Operatorët ekonomikë që duan të marrin pjesë duhet të kenë mjete të posaçme si kamion për transport, ekskavator për groposje, pajisje dezinfektimi dhe për asgjësimin e shpezëve me gaz, si dhe të angazhojnë të paktën katër punëtorë për procesin. Afati për dorëzimin e ofertave është 15 korriku 2026, ndërsa kontrata do t’i jepet ofertuesit me çmimin më të ulët.