Guvernatori i Bankës Qendrore të Kosovës, Ahmet Ismaili, së bashku me drejtues të Administratës Tatimore, Njësisë për Inteligjencë Financiare dhe Inspektoratit Qendror të Mbikëqyrjes së Tregut, zhvilluan një takim për të forcuar bashkëpunimin ndërinstitucional në sektorin financiar. Diskutimet u përqendruan në ruajtjen e integritetit financiar, respektimin e legjislacionit dhe promovimin e konkurrencës së drejtë, me fokus të veçantë në zbatimin e Ligjit për Kripto-Asetet dhe rregulloret për licencimin dhe mbikëqyrjen e aktiviteteve të lidhura me kripto-asetet. Palët theksuan nevojën që vetëm subjektet e licencuara të operojnë në këtë fushë për të mos cenuar stabilitetin financiar dhe mbrojtjen e konsumatorëve. Në përfundim, institucionet ranë dakord të vazhdojnë koordinimin dhe shkëmbimin e informacionit për të mbështetur stabilitetin financiar dhe integritetin e tregut në Kosovë.