Guvernatori i Bankës Qendrore të Kosovës, Ahmet Ismaili, priti Drejtorin Ekzekutiv të Autoritetit të Tregut Financiar të Austrisë, Helmut Ettl, në një takim ku u diskutuan zhvillimet e fundit makroekonomike dhe reformat strategjike të sektorit financiar të Kosovës. Palët theksuan bashkëpunimin e ngushtë ndërmjet institucioneve financiare të Kosovës dhe Austrisë, duke përfshirë shkëmbimin e ekspertizës dhe përpjekjet për përafrimin e kornizës rregullative me standardet evropiane dhe ndërkombëtare. Në fokus ishin edhe temat e mbikëqyrjes së rrezikut, parandalimit të pastrimit të parave, sigurisë kibernetike, modernizimit të infrastrukturës së pagesave dhe përgatitjet për raportimin financiar të vitit 2027. Takimi përfundoi me zotimin për forcimin e mëtejshëm të bashkëpunimit me FMN-në dhe partnerët ndërkombëtarë, në mbështetje të zhvillimit institucional, stabilitetit financiar dhe integrimit evropian të sektorit financiar të Kosovës.