Ministrja në detyrë e Ekonomisë së Kosovës, Artane Rizvanolli, dhe ministri i Infrastrukturës dhe Energjisë i Shqipërisë, Enea Karakaçi, kanë zhvilluar një takim ku diskutuan prioritetet e përbashkëta në sektorin e energjisë. Një nga temat kryesore ishte bashkëpunimi për projektin e termocentralit të Vlorës, i cili do të furnizohet me gaz të lëngëzuar natyror nga Shtetet e Bashkuara të Amerikës. Sipas marrëveshjes së vitit 2022, Kosova dhe Shqipëria do të ndajnë kapacitetet e energjisë elektrike në përputhje me nevojat e tyre, duke synuar edhe zhvillimin e bursës së përbashkët të energjisë ALPEX. Gjithashtu, u diskutua për linjën e re të transmetimit 400 kV Prizren – Fierzë dhe nevoja për koordinim të ngushtë institucional dhe teknik mes dy vendeve.