Ministria e Industrisë, Ndërmarrësisë, Tregtisë dhe Inovacionit (MINTI) së bashku me Komunën e Gjilanit kanë nënshkruar një marrëveshje bashkëpunimi për projektimin e Parkut Industrial në Gjilan. Ky hap vjen pak javë pas vendimit të Qeverisë së Kosovës për shpalljen e parkut, duke synuar krijimin e kushteve të favorshme për investime dhe zgjerimin e kapaciteteve prodhuese në rajon. Projekti do të zhvillohet sipas standardeve bashkëkohore të zhvillimit të qëndrueshëm, duke përfshirë ekonominë qarkore, përdorimin e energjisë së ripërtëritshme dhe mbrojtjen e mjedisit. Përveç zhvillimit ekonomik, iniciativa synon edhe hapjen e vendeve të reja të punës dhe krijimin e mundësive të barabarta për të gjithë qytetarët e Gjilanit.