Ministri në detyrë i Infrastrukturës dhe Transportit, Dimal Basha, së bashku me ministren në detyrë të Mjedisit dhe Planifikimit Hapësinor, Fitore Pacolli, inspektuan punimet për rehabilitimin e rrugës Prekoc–Marec–Krilevë, një projekt 16 kilometra me vlerë 3.1 milionë euro. Gjatë vizitës u theksua bashkëpunimi i ngushtë ndërmjet dy ministrive për të koordinuar punimet rrugore me masat për mbrojtjen dhe trajtimin e lumit Marec përgjatë këtij segmenti. Qëllimi i këtij koordinimi është parandalimi i vërshimeve dhe mbrojtja e trupit të rrugës nga dëmtimet e mundshme në të ardhmen, duke siguruar një infrastrukturë më të qëndrueshme dhe njëkohësisht respektimin e politikave mjedisore. Ministri Basha theksoi se kjo qasje ndërinstitucionale synon harmonizimin e infrastrukturës rrugore me mbrojtjen e lumenjve, duke garantuar qarkullim më të sigurt dhe kujdes për mjedisin.