Kryesia e Bordit Industrial të Universitetit të Shkencave të Aplikuara në Ferizaj (USHAF), që përfaqëson mbi 120 biznese partnere, ka reaguar fuqishëm ndaj mospërfshirjes së universitetit në Projektligjin për Buxhetin e Kosovës. Ata paralajmërojnë se mungesa e financimit rrezikon ndërprerjen e një modeli të suksesshëm bashkëpunimi mes arsimit të lartë dhe sektorit privat, i cili ka kontribuar në përgatitjen e kuadrove profesionale dhe zhvillimin ekonomik të vendit. Komuniteti i biznesit ka qenë partner i pandashëm i USHAF-it, duke ndihmuar në hartimin e kurrikulave, akreditimin dhe zhvillimin e laboratorëve në fusha të ndryshme praktike. Për këtë arsye, Kryesia i bën thirrje Qeverisë, Ministrisë së Arsimit dhe deputetëve të Kuvendit të Kosovës të rishqyrtojnë projektligjin dhe të sigurojnë mbështetjen financiare për universitetin, duke theksuar rëndësinë e tij për arsimin praktik, industrinë vendore dhe punësimin e të rinjve.