Instituti i Kosovës për Drejtësi (IKD) paralajmëron se bllokada institucionale në vend rrezikon të humbasë mbi 34 milionë euro nga Plani i Rritjes, i cili synon zhvillimin e sektorit privat. Kosova duhet të përmbushë shtatë reforma të rëndësishme deri në fund të vitit 2026, që lidhen me përmirësimin e klimës së biznesit, rritjen e investimeve dhe qasjen në financa. Një pjesë e këtyre reformave kërkon miratimin e ligjeve në Kuvend, por institucionet ende nuk janë funksionalizuar plotësisht, duke ngushtuar kohën për zbatimin e tyre. IKD thekson se vonesat mund të kenë pasoja jo vetëm politike, por edhe ekonomike dhe sociale, duke ndikuar drejtpërdrejt në jetën e qytetarëve dhe në zhvillimin ekonomik të vendit.