Banka Qendrore e Republikës së Kosovës (BQK) hapi aktivitetet e Javës Globale të Parasë 2026, një iniciativë ndërkombëtare për promovimin e edukimit financiar tek të rinjtë. Gjatë ceremonisë hapëse u ndanë çmimet e konkursit edukativ “Stock Market Learning Competition”, ku morën pjesë 42 studentë nga tetë fakultete ekonomike, si dhe çmime për nxënësit e shkollave të mesme në një kuiz financiar. Guvernatori i BQK-së, Ahmet Ismaili, theksoi rëndësinë e edukimit financiar për fuqizimin e qytetarëve dhe zhvillimin e një sistemi financiar gjithëpërfshirës, duke nënvizuar përkushtimin e bankës në mbrojtjen e konsumatorit dhe rritjen e përfshirjes financiare. Në kuadër të Javës Globale të Parasë, BQK njoftoi hapjen e thirrjes për “Çmimin për Ekonomistët e Rinj”, që synon të inkurajojë punime kërkimore inovative në ekonomi dhe financa, ndërsa bashkëpunimi me German Sparkassenstiftung vazhdon të forcohet për zhvillimin e kapaciteteve në fushën e edukimit financiar.