Banka Qendrore e Republikës së Kosovës (BQK) ka miratuar dy rregullore të reja që synojnë të rrisin mbrojtjen e konsumatorëve dhe transparencën në sektorin e sigurimeve. Këto rregulla vendosin standarde të reja për zhvillimin, shpërndarjen dhe qeverisjen e produkteve të sigurimit, duke u fokusuar në nevojat dhe interesat e klientëve gjatë gjithë ciklit jetësor të produktit. Për herë të parë, rregulloret kërkojnë informim të qartë dhe të krahasueshëm për kostot, mbulimet dhe kufizimet e produkteve, si dhe trajtim të veçantë për konsumatorët e cenueshëm. BQK ka parashikuar një periudhë tranzitore 12-mujore për industrinë e sigurimeve, gjatë së cilës do të përshtaten politikat, procedurat dhe praktikat e tregut në përputhje me standardet e reja, me qëllim rritjen e besimit dhe përgjegjshmërisë në këtë sektor.