Në Gjermani, çmimet e karburantit kanë arritur rekorde historike para festave të Pashkëve, me një litër naftë që në disa pompa kushton deri në 3 euro. Kjo rritje vjen pavarësisht masave të reja të qeverisë që lejojnë stacionet e benzinës të rrisin çmimet vetëm një herë në ditë, në mesditë, masa kjo që nuk ka ndaluar rritjen drastike të çmimeve. Klubi Gjerman i Automobilave (ADAC) kritikoi rritjen, duke theksuar se çmimet e naftës bruto kanë rënë në gjysmën e parë të javës, dhe se kompanitë e naftës po shfrytëzojnë situatën për të mbrojtur fitimet e tyre. Qeveria gjermane po përballet me presion për të marrë masa shtesë, duke përfshirë lehtësira tatimore për udhëtimet me makinë dhe uljen e taksave mbi produktet energjetike, ndërkohë që edhe vendet fqinje si Polonia monitorojnë situatën për shkak të fluksit të shoferëve gjermanë që shkojnë atje për karburant më të lirë.