Shoqata e Naftëtarëve të Kosovës ka paralajmëruar një rritje të mundshme të çmimeve të derivateve të naftës në ditët në vijim, për shkak të tensioneve të fundit gjeopolitike në Iran dhe krizave ndërkombëtare që kanë ndikuar në bursat globale. Aktualisht, kostoja e furnizimit ka arritur në 1.73 euro për litër, niveli më i lartë që nga prilli i këtij viti, duke tejkaluar në disa raste çmimin e shitjes me pakicë në pikat e karburanteve. Shoqata thekson se operatorët po furnizohen me çmime më të larta dhe stoqet po zëvendësohen me produkte të blera sipas kushteve të reja të tregut, duke krijuar pasiguri në tregun vendor. Për më tepër, presioni mbi çmimet mund të vazhdojë për shkak të rritjes së kërkesës dhe uljes së stokut në Evropë, Azi dhe SHBA, ndërsa Shoqata bën thirrje për përgjegjësi dhe mirëkuptim nga institucionet dhe publiku.