Komuna e Prishtinës po punon në ndryshimin e rregullores për menaxhimin e parkingjeve, duke marrë parasysh vendimin e Gjykatës Supreme të vitit të kaluar që shpalli pjesërisht të paligjshme rregulloren aktuale. Drejtori për Zhvillim Ekonomik dhe Inovacion, Luftar Braha, ka njoftuar se tarifat e “Prishtina Parking” mund të rriten, por çmimet përfundimtare do të vendosen pas një procesi dëgjimi publik dhe analizash ekonomike. Një nga prioritetet kryesore është lirimi i trotuareve për të siguruar hapësira më të sigurta dhe të aksesueshme për këmbësorët, përfshirë nënat dhe personat me nevoja të veçanta. Gjithashtu, do të rritet numri i “merimangave” për bllokimin dhe konfiskimin e automjeteve, ndërsa “Prishtina Parking” do të asistojë Policinë dhe Inspeksionin në këto veprime, pasi nuk ka mandat për të shqiptuar gjoba vetë.