Kryetari i Bashkisë së Lezhës, Pjerin Ndreu, ka reaguar pas një fluksi të madh ankesash nga qytetarët lidhur me çmimet e shezlloneve në plazhet e zonës. Ai sqaroi se rreth 66% e vijës bregdetare është plazh publik me tarifa minimale, ndërsa plazhet e hotelerive janë të dedikuara për klientët e tyre dhe çmimet aty duhet të njihen paraprakisht. Bashkia nuk ka kompetencë për përcaktimin e çmimeve të parkingjeve private, por po monitoron me kujdes situatën dhe po ndërhyn për çdo rast të denoncuar në kohë reale. Ndreu bëri të ditur se vetëm gjatë ditës së fundit, pas denoncimeve, disa klientëve u janë rikthyer pagesat e kryera, duke garantuar vazhdimin e monitorimit dhe mbrojtjen e interesit publik.