Kryetari i AAK-së, Ramush Haradinaj, pas vizitës në kompaninë “Artatex Group” në Pejë, ka ngritur shqetësimin për ndikimin e çmimit të lartë të energjisë elektrike mbi bizneset prodhuese në Kosovë. Ai vlerësoi “Artatex Group” si një shembull suksesi të një biznesi familjar që punëson kryesisht gra, duke theksuar rëndësinë e prodhimit vendor për ekonominë e vendit. Megjithatë, Haradinaj theksoi se varësia nga importi i energjisë dhe mungesa e investimeve në kapacitete të reja po rëndojnë situatën ekonomike dhe po e bëjnë furnizimin më të shtrenjtë për bizneset. Ai kërkoi që energjia të jetë prioritet strategjik për Aleancën, duke nënvizuar nevojën për rritje urgjente të prodhimit vendor dhe investime në kapacitete të reja për të siguruar furnizim më të qëndrueshëm dhe çmime më të përballueshme.