Ministria e Mjedisit dhe Planifikimit Hapësinor në bashkëpunim me operatorët “Globi Metal” SH.P.K. nga Lipjani dhe “Zhuri” SH.P.K. nga Prizreni kanë njoftuar organizimin e debateve publike lidhur me kërkesat për leje mjedisore. Debati i parë do të mbahet më 18 gusht në Banullë të Lipjanit, ku do të diskutohet për qendrën e grumbullimit të mbeturinave metalike, plastike dhe akumulatorëve. Më 21 gusht, në Zhur të Prizrenit, do të zhvillohet debati për vazhdimin e lejes mjedisore për shfrytëzimin e gurit gëlqeror. Të dy debatet do të jenë të hapura për publikun dhe do të mund të ndiqen edhe virtualisht përmes platformës ZOOM, duke u ofruar qytetarëve mundësinë për të dhënë komente dhe sugjerime.