Një delegacion i lartë i Bankës Qendrore të Republikës së Kosovës, i kryesuar nga Guvernatori Ahmet Ismaili, po merr pjesë në Takimet Pranverore 2026 të Fondit Monetar Ndërkombëtar dhe Bankës Botërore, që po zhvillohen nga 13 deri më 18 prill në Washington DC. Gjatë këtyre takimeve, delegacioni do të zhvillojë biseda me drejtues dhe zyrtarë të lartë të FMN-së, Bankës Botërore, Thesarit Amerikan, Korporatës Financiare Ndërkombëtare dhe institucioneve financiare partnere, me qëllim forcimin e bashkëpunimit dhe diskutimin e zhvillimeve makroekonomike dhe financiare globale. Guvernatori Ismaili dhe bashkëpunëtorët e tij do të paraqesin progresin e reformave në sektorin financiar të Kosovës, rezultatet e programeve të asistencës teknike dhe projektet strategjike të BQK-së. Përveç takimeve bilaterale, delegacioni do të marrë pjesë në aktivitete të ndryshme të organizuara në kuadër të Takimeve Pranverore, ku diskutohet edhe për perspektivën ekonomike globale dhe stabilitetin financiar.