Drejtori i Bujqësisë në Rahovec, Behar Thaqi, ka bërë me dije se reshjet e dendura të shiut dhe erërat e forta kanë shkaktuar dëme të konsiderueshme në sektorin e bujqësisë dhe infrastrukturën rrugore të komunës. Dëmet më të mëdha janë regjistruar në kulturat e specit, pjeprit dhe shalqirit, ndërsa vetëm erërat e forta të 27 korrikut kanë shkaktuar dëme prej rreth 100 mijë eurosh. Vërshimet e muajit janar dhe reshjet e fundit kanë shkaktuar gjithashtu humbje të mëdha, duke arritur në disa qindra mijëra euro, përfshirë dëme në rrugë që kapin mbi 50 mijë euro. Drejtori Thaqi ka bërë thirrje që Qeveria e Kosovës të ndërhyjë me mbështetje financiare për fermerët, pasi institucionet komunale mund të bëjnë vetëm evidentimin e dëmeve, ndërsa kompensimi mbetet përgjegjësi e nivelit qendror.