Dhoma e Tregtisë dhe Industrisë së Kosovës (DhTIK) ka shprehur shqetësim të thellë për pasojat negative të bllokadës së gjatë të Ligjit për Pronën Publike, e cila po rrezikon seriozisht bizneset dhe vendet e punës në vend. Drejtori ekzekutiv Kushtrim Ahmeti theksoi se kjo krizë institucionale ka thelluar problemet ekonomike, duke ulur fuqinë ekonomike të kompanive, rritur çmimet dhe importet nga Serbia dhe Maqedonia e Veriut, si dhe duke shkaktuar probleme zinxhirore. Shumë kompani kanë hequr dorë nga investimet në Kosovë, ndërsa të tjera po kërkojnë mundësi investimi jashtë vendit, duke dërguar një mesazh negativ për investimet e huaja. Në një takim ku u diskutua edhe ndikimi i bllokadës në sektorin minerar, anëtarët e bordit dhe grupit të punës ranë dakord për nevojën emergjente të ndërhyrjes për ndryshimin e Ligjit për Pronën Publike për të mbrojtur bizneset dhe ekonominë e vendit.