Dhoma e Tregtisë dhe Industrisë së Kosovës (DHTIK) ka shprehur shqetësim për draft-rregulloren e Komunës së Prishtinës që propozon ndryshime në tarifat, ngarkesat dhe gjobat komunale, duke paralajmëruar ndikim negativ në klimën e biznesit, konkurrueshmërinë dhe investimet në kryeqytet. Sipas DHTIK-së, rritja e konsiderueshme e tarifave për disa veprimtari, pa analiza ekonomike dhe konsultime të mjaftueshme me komunitetin e biznesit, do të krijojë një barrë financiare të rëndë, sidomos për ndërmarrjet e vogla dhe të mesme si furrat e bukës, kafeteritë dhe dyqanet. Dhoma kundërshton gjithashtu tarifimin e veçantë për secilën njësi biznesore, pasi kjo do të rrisë kostot operative dhe do të pengojë zgjerimin e bizneseve, duke ndikuar negativisht në aktivitetin ekonomik. Në reagim, DHTIK i bën thirrje Komunës së Prishtinës të rishikojë draft-rregulloren dhe të zhvillojë konsultime të zgjeruara me komunitetin e biznesit për të gjetur zgjidhje që mbrojnë interesin publik pa dëmtuar zhvillimin ekonomik dhe konkurrueshmërinë e sektorit privat.