Dhoma e Tregtisë dhe Industrisë së Kosovës (DHTIK) ka shprehur shqetësim për ndikimet negative të zhvillimeve të fundit në Lindjen e Mesme, të cilat po shkaktojnë rritje të çmimeve të derivateve të naftës në Kosovë. Duke qenë se vendi importon 100% të karburanteve, kjo rritje po ndikon drejtpërdrejt në rritjen e kostove të transportit dhe prodhimit, duke rënduar sektorët më të ndjeshëm të ekonomisë dhe duke rritur kostot e jetesës për qytetarët. DHTIK paralajmëron se kjo situatë mund të çojë në rritje të inflacionit, ulje të konkurrueshmërisë së bizneseve vendëse dhe zvogëlim të potencialit për eksport, veçanërisht në një kohë kur çmimet e energjisë janë gjithashtu në rritje. Dhoma bën thirrje për veprime të menjëhershme nga institucionet, duke propozuar ulje ose pezullim të taksave për bizneset më të prekura dhe rishikim të barrës tatimore për produktet esenciale, ndërsa ofron kontributin e saj për tejkalimin e krizës.