Dogana e Kosovës ka arritur të arkëtojë 1 miliard e 347 milionë euro të hyra, duke shënuar një rritje prej 6% krahasuar me të njëjtën periudhë të vitit të kaluar. Kryeministri në detyrë, Albin Kurti, gjatë vizitës në këtë institucion, vlerësoi se kjo rritje dëshmon përmirësimin e vazhdueshëm të performancës së Doganës dhe theksoi se nga viti 2021 deri në 2025, të hyrat doganore kanë tejkaluar trefish normën e rritjes ekonomike. Në kuadër të reformave për lehtësimin e veprimtarisë së bizneseve, janë përmbyllur proceset e shtetëzimit të terminaleve doganore dhe është zbatuar deklarimi paraprak i mallrave, i cili ka ulur kohën e procesimit me rreth 70%. Përveç kësaj, Dogana ka forcuar kontrollet kufitare dhe ka rritur përdorimin e teknologjisë, duke përfshirë funksionalizimin e skanerit në Merdarë për parandalimin e kontrabandës, ndërsa po avancojnë projekte strategjike si Dritarja e Vetme Kombëtare, Tranziti i Përbashkët dhe automatizimi i proceseve.