Kompania kosovare e qumështit Drena ka dërguar një letër të hapur institucioneve të Kosovës, duke shprehur shqetësimin për gjendjen e vështirë të sektorit vendor të prodhimit të qumështit dhe produkteve të tij. Ajo paralajmëron se fermerët dhe përpunuesit vendorë po përballen me kosto të larta, mungesë mbështetjeje dhe konkurrencë të pabarabartë nga produktet e importuara, të cilat përmbajnë yndyra bimore, vaj palme dhe qumësht pluhur. Drena kërkon trajtim të barabartë për produktet vendore dhe të importuara, subvencionim për përpunimin e qumështit, mbështetje për eksportin, prioritet në institucionet shtetërore, si dhe fushata vetëdijesuese për konsumimin e produkteve vendore. Kompania thekson se zhvillimi i sektorit blegtoral është interes kombëtar dhe strategjik, duke u shprehur e gatshme për bashkëpunim me institucionet për zgjidhje konkrete që forcojnë fermerët dhe prodhimin “Made in Kosova”.