Nga janari i vitit 2026, qytetarët e Kosovës përballen me dyfishimin e tatimit në pronë, ndërsa për pronat komerciale rritja mund të arrijë deri në 200-300 për qind. Shumë qytetarë shprehen të pakënaqur dhe ankohen për barrën e rëndë financiare, veçanërisht pensionistët dhe familjet me të ardhura të ulëta. Ekonomistët kërkojnë shtyrjen ose pezullimin e zbatimit të këtij ligji, duke argumentuar se shteti duhet të gjejë mënyra të tjera për të rritur të ardhurat pa dëmtuar bizneset dhe qytetarët. Ministria e Financave kishte parashikuar falje të tatimit deri në 100 euro, por kjo masë u rrëzua nga Gjykata Kushtetuese, duke lënë vendim-marrjen në dorë të komunave, shumica e të cilave vendosën të mos falin borxhet për të mos dëmtuar buxhetin lokal.