Dogana e Kosovës ka nisur një procedurë kundërvajtëse ndaj një subjekti ekonomik, i cili dyshohet për keqpërdorim të procedurës së lirimit nga detyrimet doganore dhe tatimore gjatë importit të lëndës së parë për prodhim. Gjatë kontrolleve të rregullta pas zhdoganimit, zyrtarët doganorë zbuluan mospërputhje ndërmjet gjendjes faktike të mallrave dhe dokumentacionit, si dhe mungesë aktiviteti prodhues në kapacitetet e subjektit. Dyshohet se një pjesë e mallrave, përfshirë gëzofe natyrale qengji dhe materiale për prodhim tekstili dhe aksesorësh prej lëkure, janë transferuar te një subjekt tjetër që nuk ka të drejtën e përfitimit të lirimeve doganore. Vlera doganore e mallrave të përfshira në kundërvajtje kap mbi 285 mijë euro, ndërsa shmangia e detyrimeve tatimore është mbi 51 mijë euro, dhe rasti po trajtohet në bashkëpunim me autoritetet kompetente sipas legjislacionit në fuqi.