Organizata Demokraci Plus (D+) ka zbuluar një seri shkeljesh procedurale në tenderin e Ministrisë së Infrastrukturës dhe Transportit për identifikimin dhe regjistrimin e pronave, me vlerë 299,740 euro. Raporti tregon se disa kritere të kualifikimit ishin të kufizuara dhe favorizuan operatorët ekonomikë të përzgjedhur, ndërsa ndryshimet e bëra në kriteret e tenderit nuk respektuan afatet ligjore për përgatitjen e ofertave. D+ evidenton gjithashtu trajtim jo transparent dhe jo të barabartë të ankesave nga ana e autoritetit kontraktues dhe Organit Shqyrtues të Prokurimit, duke përfshirë pretendime anonime dhe arsye të reja për eliminim që nuk ishin komunikuar qartë. Kjo situatë ngre shqetësime serioze për mungesën e transparencës, parashikueshmërisë dhe konkurrencës së drejtë në procedurat e prokurimit publik.