Forumi Ekonomik Mbarëshqiptar (FEMSH) ka shprehur shqetësim për ngecjet në integrimin ekonomik rajonal, duke theksuar se pavarësisht marrëveshjeve të shumta, hapësira ekonomike mbarëshqiptare funksionon nën potencialin e saj për shkak të barrierave administrative dhe mungesës së zbatimit të tyre. FEMSH kërkon një ndryshim thelbësor në qasjen e institucioneve publike ndaj sektorit privat, duke e konsideruar biznesin partner strategjik në hartimin dhe zbatimin e politikave ekonomike. Forumi propozon institucionalizimin e dialogut të rregullt mes qeverive dhe biznesit për të monitoruar zbatimin e marrëveshjeve dhe për të adresuar problemet që pengojnë zhvillimin ekonomik rajonal. Gjithashtu, FEMSH nxit përfundimin e projekteve strategjike infrastrukturore dhe harmonizimin e legjislacionit për të krijuar një treg të përbashkët më konkurrues dhe më tërheqës për investime në rajon.