Përfaqësuesit e Odës Ekonomike të Maqedonisë Veri-Perëndimore (OEMVP) zhvilluan një takim pune me ministrin për Marrëdhënie ndërmjet Bashkësive, Agon Ferati, ku diskutuan për forcimin e bashkëpunimit institucional dhe mbështetjen e komunitetit të biznesit. Kryetari i OEMVP-së, Nuhi Aliu, theksoi rëndësinë e komunikimit të rregullt ndërmjet institucioneve për një bashkëpunim të qëndrueshëm. Ministri Ferati njoftoi gatishmërinë për nënshkrimin e një Memorandumi Bashkëpunimi me OEMVP-në, që do të mundësojë organizimin e trajnimeve dhe aktiviteteve të përbashkëta për kompanitë anëtare. Drejtori Ekzekutiv i OEMVP-së, Durim Zeqiri, shtoi se Oda do të vërë në dispozicion kapacitetet dhe ekspertizën e Qendrës së Trajnimeve edhe për institucionet dhe subjektet publike, duke synuar zhvillimin e kapaciteteve profesionale në rajon.