Ministria e Bujqësisë, Pylltarisë dhe Zhvillimit Rural ka reaguar pas protestave të fermerëve lidhur me ndërprerjen e grumbullimit të qumështit dhe uljen e çmimit të tij, duke theksuar se fermerët nuk janë objekt i procedurave administrative që po zhvillohen. Masat e ndërmarra synojnë forcimin e sigurisë ushqimore, mbrojtjen e konsumatorit dhe krijimin e kushteve të barabarta për operatorët në treg, jo ndëshkimin e fermerëve apo industrisë së përpunimit. Ministria po bashkëpunon me institucionet dhe përfaqësuesit e sektorit për të garantuar vazhdimin e grumbullimit të qumështit dhe shmangien e dëmeve ekonomike për fermerët. Gjithashtu, janë intensifikuar kontrollet në kufi dhe treg, si dhe analizat laboratorike për të siguruar respektimin e legjislacionit dhe për të mbrojtur konsumatorët dhe prodhimin vendor.