Afati për aplikim në Programin e Pagesave Direkte në Komunën e Podujevës është shtyrë deri më 31 korrik 2026, duke i dhënë fermerëve edhe 10 ditë kohë shtesë për të përfituar nga mbështetja bujqësore. Aplikimi mund të bëhet në zyrën numër 31 të objektit të vjetër të administratës komunale, përfshirë edhe ditët e shtunë nga ora 08:00 deri në 16:00. Programi mbulon pagesa bazë për të ardhurat nga sipërfaqet bujqësore, pagesa rishpërndarëse për fermat e vogla dhe të mesme, pagesa të lidhura me cilësinë e prodhimit, si dhe eko-skemat për prodhimin organik dhe praktikat e qëndrueshme. Fermerët duhet të deklarojnë sipërfaqet, kulturat, kafshët dhe prodhimin sipas gjendjes reale, ndërsa blegtorët duhet të sigurojnë identifikimin dhe regjistrimin ligjor të kafshëve të tyre. Për informata shtesë, ata mund të kontaktojnë Drejtorinë për Bujqësi të Komunës ose të ndjekin kanalet zyrtare të Ministrisë së Bujqësisë dhe Agjencisë për Zhvillimin e Bujqësisë.