Sot janë realizuar pagesat e subvencioneve për drithërat dhe kulturat e tjera të arave, ku gjithsej 461,5 milionë denarë janë shpërndarë për 23.874 fermerë që kultivojnë grurë, elb, misër, oriz dhe kultura të tjera. Zëvendësministri i Bujqësisë, Pylltarisë dhe Ekonomisë së Ujërave, Albrim Hoxha, theksoi se këto pagesa janë pjesë e dinamikës së planifikuar për realizimin e subvencioneve dhe synojnë që mjetet të arrijnë në kohë te fermerët. Më parë janë paguar subvencione për rritësit e dhive dhe gjedheve, si dhe për prodhimin organik, ndërsa tani vijojnë pagesat për drithërat dhe kulturat e tjera të arave. Këto fonde janë pjesë e Programit për Mbështetje Financiare në Bujqësi për vitin 2025 dhe përfshijnë pagesa direkte sipas sipërfaqes së punueshme bujqësore për kultura të ndryshme, duke përfshirë bimët mjekësore, aromatike, erëzat dhe lulet.