Ministrja në detyrë e Industrisë, Ndërmarrësisë, Tregtisë dhe Inovacionit, Mimoza Kusari-Lila, ka nënshkruar marrëveshjen për përkrahjen e projektit dhe vijimin e punimeve në Parkun Industrial të Lipjanit me kryetarin e komunës, Imri Ahmeti. Marrëveshja siguron mbështetje financiare prej 2,672,554.61 euro për ndërtimin e infrastrukturës fizike në fazën “V” të parkut, që shtrihet në 56 hektarë dhe tashmë ka biznese operative, përfshirë edhe një që eksporton në tregun amerikan. Kusari-Lila theksoi rëndësinë e këtij projekti për zhvillimin ekonomik dhe krijimin e mundësive të reja për bizneset dhe qytetarët e Lipjanit, si dhe për zhvillimin industrial të vendit në përgjithësi. Punimet do të vazhdojnë me intensitet, ndërsa MINTI mbetet i përkushtuar për ta shndërruar parkun në një qendër të rëndësishme industriale në rajon.