Sot u zhvillua takimi i parë i Komitetit Monitorues për Bashkëpunimin për Zhvillim, një mekanizëm ndërinstitucional i krijuar për të mbështetur koordinimin dhe monitorimin e fondeve të Bashkimit Evropian dhe partnerëve zhvillimorë në Kosovë. Në këtë takim morën pjesë përfaqësues nga ministritë, agjencitë dhe institucionet përgjegjëse për zbatimin e projekteve të financuara nga BE-ja, ku u diskutua për ecurinë e projekteve ekzistuese dhe përgatitjet për aplikimet e ardhshme në kuadër të Kornizës Investuese për Ballkanin Perëndimor (WBIF). Komiteti synon të adresojë në mënyrë proaktive sfidat dhe nevojat që lindin gjatë zbatimit të projekteve zhvillimore, duke siguruar koordinim të përbashkët institucional në përputhje me prioritetet shtetërore të Kosovës. Ky forum pritet të jetë një instrument kyç për përmirësimin e menaxhimit dhe efektivitetit të fondeve zhvillimore në vend.