Kuvendi i Kosovës ka ratifikuar marrëveshjen e kredisë ndërmjet Kosovës dhe Bankës Evropiane për Investime, duke siguruar financimin e plotë për ndërtimin e parkut solar me kapacitet minimal prej 100 megavatësh në Korporatën Energjetike të Kosovës (KEK). Projekti, i quajtur “Energjia Diellore Fotovoltaike në KEK – Porta Globale”, ndodhet aktualisht në fazën e marrjes së lejeve të nevojshme për ndërtim dhe në procesin e tenderimit, me plan që kontrata të nënshkruhet deri në fund të vitit dhe ndërtimi të fillojë vitin e ardhshëm. Parku solar do të ndërtohet në një sipërfaqe të pashfrytëzuar të deponisë së hirit në KEK dhe pritet të gjenerojë së paku 152 GWh energji elektrike në vit, duke kontribuar në diversifikimin dhe modernizimin e KEK-ut, si dhe në uljen e emetimeve të dioksidit të karbonit me rreth 140,000 tonë në vit. Ministrja e Ekonomisë, Artane Rizvanolli, ka falënderuar deputetët për mbështetjen e tyre, duke theksuar rëndësinë e këtij projekti për sigurinë e furnizimit me energji dhe pavarësinë energjetike të Kosovës.