Banka Qendrore e Republikës së Kosovës (BQK) ka përshëndetur raportin e Fondit Monetar Ndërkombëtar (FMN) që evidenton progres të rëndësishëm në forcimin e stabilitetit financiar të vendit. Raporti thekson avancimin në mbikëqyrjen e sektorit financiar, përfshirë mbikëqyrjen e bazuar në rrezik, procesin e rishikimit dhe vlerësimit mbikëqyrës (SREP/SRP), si dhe zbatimin e standardeve ndërkombëtare si Basel III. Sistemi financiar i Kosovës konsiderohet i qëndrueshëm, me banka të mirëkapitalizuara, nivel të ulët të kredive joperformuese dhe rezerva likuiditeti mbi kërkesat rregullative. Përveç kësaj, raporti vlerëson përparimet në kornizën makroprudenciale dhe kapacitetet institucionale të BQK-së, duke ofruar udhërrëfyes teknik për fazën e ardhshme të reformave dhe duke mbështetur përpjekjet për forcimin e qëndrueshmërisë dhe monitorimin e rreziqeve sistemike në sektorin financiar.