Prodhuesi legjendar i makinave Saab ka dalë nga tregu prej 15 vitesh, por tani po shiten në ankand ekzemplarët e fundit që kanë mbijetuar në fabrikën e Trollhättan në Suedi. Ky koleksion përfshin tetë automjete, shumica bazuar në modelin Saab 9-3, të zhvilluara pas falimentimit të kompanisë dhe përfshin prototipe dhe makina eksperimentale me teknologji elektrike dhe autonome. Pas përpjekjeve të kompanisë NEVS për të ringjallur markën me mbështetjen e gjigandit kinez Evergrande, projekti u ndërpre për shkak të kolapsit financiar të këtij të fundit, duke çuar në shkurtime masive dhe mbylljen graduale të fabrikës. Ankandi do të mbahet nga 21 deri më 30 maj nga shtëpia suedeze e ankandeve Klaravik, pa çmim rezervë, dhe entuziastët do të kenë mundësi të vizitojnë fabrikën para përfundimit të ofertës.