Në Ditën Ndërkombëtare të Punëtorëve, Asociacioni i Gazetarëve të Kosovës (AGK) ka ngritur alarmin për kushtet e vështira të punës që përballen gazetarët dhe punonjësit medialë në Kosovë. Sektori medial karakterizohet nga paga minimale, mungesë sigurimesh shëndetësore, kontrata jo stabile dhe shkelje të të drejtave themelore të punës, përfshirë orët e gjata dhe mungesën e kompensimit për punën gjatë ditëve të pushimit dhe festave. Situata është edhe më shqetësuese për gratë gazetare, të cilat hasin pengesa në realizimin e të drejtave ligjore si pushimi i lehonisë dhe e drejta për gjidhënie, duke u përballur me zgjedhje të vështira mes profesionit dhe familjes. AGK-ja thekson mungesën e një sindikate gjithëpërfshirëse që do të mbrojë të drejtat e punonjësve medialë dhe i bën thirrje institucioneve përgjegjëse dhe pronarëve të mediave të ndërmarrin masa konkrete për përmirësimin e kushteve të punës dhe respektimin e legjislacionit në fuqi.